Raza Musani 
ڈھاکا: بین الاقوامی فوجداری عدالت نے میانمار کی فوج اور بنیاد پرست بدھوں کے اقلیتی روہنگیا مسلمانوں کے خلاف بڑے پیمانے پر مظالم کی تحقیقات کی کوششیں تیز کرنے کا وعدہ کیا ہے۔آئی سی سی کے چیف پراسیکیوٹر کریم خان نے یہ ریمارکس بنگلہ دیش کے دورے میں نسل کشی سے بچ جانیوالے روہنگیا متاثرین سے ملاقات کے بعد دئے۔ انہوں نے کہاکہ متاثرین کی کیمپوں کی حالت دیکھ کر ان کا دل ٹوٹ گیا۔ وہ مزید متاثرین سے ملاقات کرنے اگلے سال پھر ڈھاکا آئیں گے۔ انہوں نے کہا کہ میں جو وعدہ کر سکتا ہوں وہ یہ ہے کہ ہمیں ان ملاقاتوں کے نتائج حاصل ہوں گے۔ ٹیم سخت محنت کرے گی، ہم اپنی جدوجہد تیز کرنے کی کوشش کریں گے اور ہم آگے بڑھیں گے۔ کریم خان نے روہنگیا مسلمانوں کی میزبانی اور انسانی بنیادوں پر مدد فراہم کرنے پر بنگلہ دیشی عوام کا بھی شکریہ ادا کیا۔ حالانکہ ان کا ملک 1951 کے اقوام متحدہ کے پناہ گزینوں کے کنونشن پر دستخط کنندہ نہیں ہے۔
