عالمی اداروں کی منافقت، لبنان کی تعمیر نو میں مدد حزب اللہ کو غیر مسلح کرنے سے مشروط

بیروت : عالمی اداروں اور ممالک نے منافقت کا مظاہرہ کرتے ہوئے لبنان میں تعمیر نو میں مدد کو حزب اللہ کے ہتھیار حکومت کے حوالے کرنے سے مشروط کردیا۔ لبنانی وزیر خارجہ یوسف ناجی نے کہا ہے کہ لبنان کو واضح طور پر مطلع کیا گیا ہے کہ وہاں اس وقت تک کوئی تعمیر نو یا بین الاقوامی امداد نہیں ملے گی جب تک ہتھیار مکمل طور پر ریاست کے اختیار میں نہ رکھے جائیں۔ یوسف ناجی نے بتایا کہ امریکی ایلچی مورگن اورٹاگس نے حالیہ دورہ بیروت میں آگاہ کیا تھا کہ امریکی انتظامیہ لبنان کو اپنی سرزمین کو آزاد کرانے، تعمیر نو شروع کرنے اور اس کی معیشت کو بحال کرنے میں مدد کرنا چاہتی ہے۔ یوسف ناجی نے کہا کہ بین الاقوامی برادری چاہتی ہے کہ لبنانی ریاست نہ صرف دریائے لیطانی کے جنوب میں بلکہ اپنے تمام علاقوں پر مکمل خودمختاری کا استعمال کرے۔ اب تک جو اقدامات کئے گئے ہیں وہ مثبت ہیں لیکن کافی نہیں ہیں۔ وہ مزید اور تیز تر اقدامات کی توقع کر رہے ہیں۔