Raza Musani 
نیویارک : امریکا کی 6ریاستوں میں طوفانی بگولوں نے تباہی مچا دی ہے جس کے باعث 84 افراد ہلاک اور درجنوں زخمی ہوگئے ہیں، طوفانی بگولوں نے 200 میل تک اپنے راستے میں آنے والے گھر اور کاروبار کو ملیا میٹ کردیا۔ بگولے اتنے شدید تھے کہ جو چیز بھی ان کے سامنے آئی وہ اسے اڑا لےگئے، متعدد گاڑیاں عمارتوں کے ملبے تلے دب گئیں، درخت جڑوں سے اُکھڑ گئے، بجلی کے کھمبے گر گئے اور ہزاروں افراد بجلی سے محروم ہوگئے۔ اتنی تباہی ہوئی کہ گھر، اسکول، شاپنگ سینٹرز، فیکٹریاں، اسپتال کچھ نہ بچا۔ ریاست کینٹکی کے شہر میں فیلڈ میں واقع موم بتی بنانے کی فیکٹری میں 110 افراد کام کر رہے تھے کہ اس کی چھت اُڑ گئی۔ اور ورکرز ملبے تلے دب گئے۔ اب تک 110 میں سے 40 کارکنوں کو بچا لیا گیا ہے۔خدشہ ظاہر کیا جا رہا ہے کہ اس فیکٹری میں درجنوں افراد کی ہلاکت ہوئی ہے۔ ریاست کے گورنر کا کہنا تھا کہ 189 نیشنل گارڈز کو امدادی کاموں پر لگایا گیا ہے جن کی توجہ ایک چھوٹے شہر میں فیلڈ پر ہے۔ فیلڈ میں فائر اور پولیس اسٹیشن تباہ ہوگئے ہیں جس کی وجہ سے امدادی کاموں میں دشواری ہوئی۔ہوا کے بگولوں سے کینٹکی، الی نوائے، کنسا، میزوری، ٹینیسی اور مسی سپی کی ریاستیں متاثر متاثر ہوئیں۔
