پاکستان میں انسانی حقوق کی صورتحال انتہائی تشویشناک ہے، امریکی رپورٹ

واشنگٹن : امریکی محکمہ خارجہ نے پاکستان کی موجودہ حکومت میں انسانی حقوق کی صورتحال کو انتہائی تشویشناک قرار دے دیا۔ انسانی حقوق سے متعلق امریکی رپورٹ میں پاکستان میں انسانی حقوق کی پامالیوں۔ جبری گمشدگیوں۔ آزادی اظہار پر قدغن کا احاطہ کیا گیا ہے۔ رپورٹ کے مطابق پاکستان میں فوجی اور خفیہ ایجنسیاں سویلین کنٹرول کے بغیر آزادانہ کام کرتی ہیں۔ یہ جبری گمشدگی ۔ ٹارچر۔ غیرقانونی حراستوں سمیت انسانی حقوق کی متعدد خلاف ورزیوں میں ملوث ہیں۔سیکیورٹی فورسز نے مبینہ طورپر ماورائے عدالت قتل کیے۔ کالعدم تنظیموں نےکھلے عام الیکشن میں حصہ لیا۔ رپورٹ کے مطابق پاکستان میں آزادی اظہار رائے اور میڈیا پر بھی سخت پابندیاں عائد کی گئی ہیں۔جس میں صحافیوں کیخلاف جرائم، مبہم گرفتاریاں، صحافیوں کو لاپتا کرنا، سینسر شپ اور توہین کے قوانین بھی شامل ہیں۔ میڈیا کو سیاسی تقاریر سینسر کرنے پر مجبور کردیا گیا۔ صحافی ارشد شریف کو قتل کیا گیا۔ رپورٹ کے مطابق حکومتی سطح پر کرپشن، صنفی بنیاد جرائم کے لیے تفتیش اور احتساب کی عدم موجودگی، کشیدگی کے حوالے سے جرائم یا نسلی یا فرقے کی بنیاد پر شہریوں کو نشانہ بنانے کی رپورٹس ہیں۔