حزب اللہ کی کامیاب کارروائیاں، اسرائیل اور اتحادیوں میں ہلچل

بیروت : حزب اللہ کی کامیاب کارروائیوں سے اسرائیل اور اس کے اتحادیوں میں ہلچل مچ گئی ہے۔ حزب اللہ کے حملوں سے اسرائیل کو بھاری جانی و عسکری نقصان پہنچ رہاہے۔ جس کی وجہ سے اسرائیلی وزرا جنگ کی دھمکیاں دے رہے ہیں۔ اسرائیلی فوج کے ترجمان ڈینیئل ہاگری نے کہا ہے کہ حزب اللہ حماس کی خاطر خطے کے مستقبل کو خطرے میں ڈال رہی ہے۔ سفارتی کھڑکی اب بھی کھلی ہے لیکن یہ ہمیشہ کھلی نہیں رہے گی۔ اگر اسرائیلی سلامتی کو خطرہ ہوا تو گزہ جیسی کارروائی کریں گے۔
وزیر بنی گنٹز نے کہا ہے کہ اسرائیل حزب اللہ کے ساتھ سفارتی حل میں دلچسپی رکھتا ہے۔ اگر مسئلہ حل نہ ہوا تو اسرائیلی فوج اس خطرے کو دور کر دے گی۔
ادھر امریکی وزیرخارجہ انٹونی بلنکن مشرقی وسطیٰ کے دورے میں غزہ کے بجائے جنوبی لبنان کی بات کرتے رہے۔ انہوں نے کہا کہ اسرائیل اور لبنان کی سرحدی صورتحال پر حقیقی تشویش ہے۔ یورپی یونین کے خارجہ امور کے سربراہ جوزف بوریل نے کہا کہ لبنان کو جنگ میں گھسیٹنے سے بچنا بہت ضروری ہے۔