جب تک اسرائیلی قبضہ برقرار ہے حماس ہتھیار نہیں ڈالے گی، خالد مشعل

دوحہ : حماس کے رہنما خالد مشعل نےکہا ہےکہ جب تک اسرائیلی قبضہ جاری ہے وہ ہتھیار نہیں ڈالیں گے۔ خالد مشعل نے ایک بیان میں کہاکہ فلسطینی عوام کو اپنی سرزمین پر حکومت کرنے کا حق ہے۔ غزہ اور مغربی کنارے کے فلسطینی اپنی سرزمین سے مضبوطی سے جڑے رہیں گے ۔ ان پر کوئی بیرونی سیاسی نظام مسلط نہیں کیا جا سکتا۔ انہوں نے کہا کہ غزہ کو ایک بڑی سازش کا سامنا ہے، جس میں آبادی کو بھوکا مار کر جلاوطنی پر مجبور کرنے کی کوشش کی جا رہی ہے۔ انہوں نے کہا کہ غزہ کا مستقبل، اس کی حکمرانی، اس کے ہتھیار اور اس کی مزاحمت کی طاقت خطرے میں ہے۔ انہوں نے کہا کہ مقبوضہ لوگوں کو غیر مسلح کرنا کوئی آپشن نہیں ہے۔ انہوں نے فلسطین کو درپیش چیلنجز سے نمٹنے کے لیے قومی اتحاد کی اہمیت کو اجاگر کیا اور عرب دنیا سے فلسطینی عوام کے شانہ بشانہ کھڑے ہونے کی اپیل کی۔