امریکی قرارداد فلسطینی عوام کے بنیادی حقوق اور مطالبات کو پورا نہیں کرتی، حماس

غزہ : حماس نے سلامتی کونسل کی قرارداد کو مسترد کرتے ہوئے کہا ہے کہ یہ فلسطینی عوام کے بنیادی حقوق اور مطالبات کو پورا نہیں کرتی۔ یہ غزہ پر بین الاقوامی نگرانی نافذ کرنے کی کوشش ہے۔ حماس نے ایک بیان میں کہا گیا ہے کہ یہ قرارداد غزہ کو باقی فلسطین سے الگ کرنے اور فلسطینی قومی اصولوں اور حقوق کو کمزور کرنے کی سازش ہے۔انہوں نے زور دیا کہ فلسطینی عوام کا حق خود ارادیت اور اپنی ریاست قائم کرنے کا حق منسوخ نہیں کیا جا سکتا۔ حماس نے فلسطینی مزاحمت کو ہتھیار ڈالنے کی کسی بھی منصوبہ بندی کو رد کرتے ہوئے کہا کہ مزاحمتی ہتھیار قابض ریاست کی موجودگی سے جڑے ہیں۔ انہوں نے واضح کیا کہ اس مسئلے پر کوئی بھی بات چیت صرف فلسطینی اندرونی معاملہ ہونی چاہیے اور اسے قابض ریاست کے خاتمے اور فلسطینی ریاست کے قیام کے سیاسی عمل سے جوڑا جانا چاہیے۔