حماس کا حزب اللہ سے اسرائیلی فوجیوں کو پکڑنے پر زور

غزہ : حماس کی القسام بریگیڈ کے ترجمان ابو عبیدہ نے اسرائیل کیخلاف حزب اللہ کی کارروائیوں کو سراہتے ہوئے اپیل کی ہےکہ صیہونی فوجیوں کو زندہ پکڑا جائے تاکہ اس سے قیدیوں کی رہائی ممکن بنائی جاسکے۔ القسام بریگیڈ کے ترجمان ابو عبیدہ نے کہا ہے کہ حزب اللہ کی کارروائیوں نے اسرائیلی افواج کو بھاری نقصان پہنچایا ہے۔ ان کارروائیوں میں مزید شدت لانے کی ضرورت ہے۔ ابو عبیدہ نے اسرائیلی فوجیوں کو حراست میں لینے کی اپیل کرتے ہوئے کہا کہ اس سے فلسطینی اور عرب قیدیوں کی رہائی کے لیے دباؤ بڑھایا جا سکتا ہے۔ ترجمان القسام کے مطابق فلسطینی مزاحمت کا تجربہ ظاہر کرتا ہے کہ مسلح جدوجہد قیدیوں کی رہائی کا مؤثر ذریعہ رہی ہے۔ ابو عبیدہ نے مسجد اقصیٰ تک رسائی پر پابندیوں اور خطے میں جاری کارروائیوں کو بھی تنقید کا نشانہ بناتے ہوئے عالمی برادری سے عملی اقدامات کا مطالبہ کیا۔