حماس کو غیر مسلح ہونا ہوگا، سیاسی کردار ختم نہیں کیا جائے گا، ملادینوف

یروشلم : غزہ بورڈ آف پیس کے اعلیٰ نمائندے نکولائی ملادینوف نے کہا ہے کہ حماس کو غیر مسلح ہونا ہوگا۔ اس سے سیاسی کردار ختم کرنے کا مطالبہ نہیں کیا جا رہا ہے۔ نکولائی ملادینوف نے یروشلم میں پریس کانفرنس سے خطاب کرتے ہوئے کہا کہ غزہ کے مستقبل سے متعلق سیاسی راستہ اب بھی مکمل طور پر بند ہے۔ یہ صورتحال نہ فلسطینیوں سے کیے گئے وعدوں کے مطابق ہے اور نہ ہی ان کی توقعات کے مطابق ہے۔ ملادینوف نے کہا کہ غزہ میں جنگ بندی اگرچہ برقرار ہے لیکن یہ نہ تو مکمل ہے اور نہ ہی مستحکم۔ انہوں نے زور دیا کہ تمام فریقین کو غیر مسلح ہونا ہوگا اور یہ شرط کسی بھی صورت میں مذاکرات کے قابل نہیں۔ ان کا کہنا تھا کہ موجودہ صورتحال اسرائیلی عوام کی سیکیورٹی کی توقعات کو بھی پورا نہیں کرتی۔ ملادینوف نے کہا کہ غزہ کا سیاسی اور انسانی مستقبل غیر یقینی ہے اور موجودہ فریم ورک اس بحران کا مکمل حل فراہم نہیں کر رہا۔