امن کیلئے حماس کو ہرصورت نابود ہونا چاہیے، امریکی وزیرخارجہ کی بھڑکیں

تل ابیب: امریکی وزیر خارجہ مارکو روبیو نے غزہ میں اسرائیل کے غیر انسانی جنگی مقاصد کی مکمل تائید کرتے ہوئے دھمکی دی ہے کہ حماس کو ہرصورت نابود ہونا چاہیے۔ اسرائیلی وزیراعظم نیتن یاہو سے ملاقات کے بعد مشترکہ نیوز کانفرنس میں مارکو روبیو نے بڑی بڑی بھڑکیں مارتے ہوئے کہا کہ حماس فوجی یا سرکاری فورس کے طور پر برقرار نہیں رہ سکتی۔ انہوں نےکہا کہ جب تک حماس حکومت کرنے یا تشدد کے خطرہ کے طور پر موجود ہے امن ناممکن ہو جاتا ہے۔ اس کا خاتمہ ضروری ہے۔ نیتن یاہو نے ٹرمپ کے منصوبے کا خیرمقدم کرتے ہوئے اسے جرات مندانہ قرار دیا اور کہا کہ ان کے اور ٹرمپ کے پاس غزہ کے مستقبل کے لیے مشترکہ حکمت عملی موجود ہے۔ ہم اس حکمت عملی کی تفصیلات ہمیشہ عوام کے ساتھ شیئر نہیں کر سکتے۔ انہوں نے دھمکی دی کہ غزہ پر جہنم کے دروازے بھی اس صورت میں یقینی طور پر کھلیں گے اگر ہمارے قیدیوں کو رہا نہ کیا گیا۔