حماس کا جنگ بندی کے بقیہ مراحل مکمل کرنے کے عزم کا اظہار

غزہ : حماس نے عرب لیگ کے سربراہ اجلاس کے نام خط میں جنگ بندی کے بقیہ مراحل مکمل کرنے کے عزم کا اظہار کیا ہے۔ خط میں لکھا گیاہے کہ حماس جنگ بندی معاہدے کے بقیہ مراحل کو مکمل کرنے کے لیے اپنی خواہش کا اعادہ کرتی ہے جس کے نتیجے میں ایک جامع اور مستقل جنگ بندی، غزہ سے قابض افواج کا مکمل انخلاء، تعمیر نو اور محاصرہ ختم ہو جائے۔ خط میں لکھا گیا ہے کہ وہ غزہ کی سرزمین پر کسی بھی غیر فلسطینی منصوبے یا انتظامیہ یا کسی بھی غیر ملکی افواج کی موجودگی کو مسلط کرنے کی کوشش کو واضح طور پر مسترد کرتے ہیں۔
خط کے مطابق ہم کسی بھی ایسے اقدام کے ساتھ تعاون کرنے کے لیے تیار ہیں جو فلسطینیوں کو غزہ سے بے گھر کرنے کی کوششوں کا مقابلہ کرے اور فلسطینیوں کے حقوق کو نظر انداز کئے بغیر غزہ کی تعمیر نو کی کوشش کرے۔