حماس حملہ فلسطینیوں کے خلاف جنگ کا جواز نہیں بن سکتا، اقوام متحدہ

جنیوا: اقوام متحدہ کے ریلیف کوآرڈینیٹر نے کہا ہے کہ حماس کی کارروائیوں کا یہ مطلب نہیں کہ تمام فلسطینیوں پر جنگ مسلط کردی جائے۔ اقوام متحدہ کے ریلیف کوآرڈینیٹر مارٹن گریفتھس نے وضاحت کی ہے کہ غزہ کی صورتحال تباہ کن اور ناقابل قبول ہے۔ حماس کے اقدامات فلسطینیوں کے خلاف جنگ کا جواز نہیں بن سکتے۔ انہوں نے کہا کہ پورے محلوں کا وجود مٹا دیا گیا ہے۔ غزہ میں جو کچھ ہو رہا ہے وہ اجتماعی سزا کے سوا کچھ نہیں ہے۔ انہوں نے کہا کہ غزہ میں جاری تنازعہ ایک جنگل کی آگ ہے جو پورےخطے میں پھیل سکتی ہے۔انہوں نے ایندھن سمیت امداد کو محفوظ طریقے سے اور بغیر کسی پابندی کے غزہ تک پہنچانے کی ضرورت پر بھی زور دیا۔ انہوں نے کہا کہ غزہ کی پٹی کو روزانہ پہنچنے والی امداد سے کم از کم 5 گنا زیادہ امداد کی ضرورت ہے۔