Raza Musani 
غزہ : حماس اور اسرائیل نے چھ سو بیس فلسطینیوں کی رہائی کا تنازعہ حل کرنے پر اتفاق کرلیا ہے۔ حماس کے وفد نے سینئر عہدیدار خلیل الحیا کی سربراہی میں قاہرہ میں مصری عہدیداروں سے ملاقات کی تاکہ جنگ بندی اور قیدی تبادلے کے معاہدے کے ساتھ ساتھ مذاکرات کے اگلے مرحلے کی تیاریوں پر بھی تبادلہ خیال کیا جاسکے۔ ملاقات میں طے کیا گیا کہ اسرائیل چار اسیروں کی لاشوں کے بدلے چھ سو بیس فلسطینی قیدیوں کو آزاد کرے گا۔ جن کی رہائی اسرائیل نے موخر کردی تھی۔ حماس نے ایک بیان میں کہا ہے کہ معاہدے پر عملدرآمد کو یقینی بنانے کے لئے ایک حل طے کیا گیا ہے کہ فلسطینی قیدیوں کی رہائی بیک وقت اسرائیلی باقیات کی حوالگی کے ساتھ ساتھ ہوگی۔ اسرائیلی عہدیدار نے تصدیق کی کہ چار اسرائیلی یرغمالیوں کی باقیات بغیر کسی تقریب کے واپس کردی جائیں گی اور فلسطینی قیدیوں کو آہستہ آہستہ اسرائیلی جیلوں سے رہا کیا جائے گا۔
