Raza Musani 
غزہ : حماس اور اسرائیل کے درمیان عارضی جنگ بندی میں دو روز کی توسیع کردی گئی ہے۔ جنگ بندی کی شرائط پہلے معاہدے جیسی ہی ہیں۔ دو دنوں میں بیس اسرائیلی رہا کئےجائیں گے۔ جبکہ اسرائیل ساٹھ فلسطینیوں کو رہا کرے گا۔ قطر کا کہنا ہے کہ کوشش ہے کہ عارضی جنگ بندی مستقل جنگ بندی میں تبدیل ہوجائے۔ اب دونوں فریقین کے درمیان کسی بھی قسم کی جھڑپیں نہ ہوں اور غزہ میں فوری طور پر امداد پہنچا کر انسانی جانوں کو بچایا جائے۔
اس سے پہلے حماس نے قیدیوں کے تبادلے کے چوتھے مرحلے میں گیارہ اسرائیلی رہا کردئے۔ جس میں فرانس۔ جرمنی اور ارجنٹینا کے دہری شہریت کے افراد شامل ہیں۔ بدلے میں اسرائیل نے تین فلسطینی خواتین اور 30 بچوں کو رہا کردیا۔ فلسطینیوں کا رام اللہ پہنچنے پر بھرپور خیرمقدم کیا گیا ۔جبکہ رہائی پانے والے فلسطینی بچے والدین سے لپٹ کر رو پڑے۔ فلسطینیوں نے کہا کہ ان کی رہائی کی خوشی پر غزہ کے شہداء کا غم بھاری ہے۔
