Raza Musani 
شکار پور : سانحہ شکارپور کی ساتویں برسی کے موقع عظمت شہداء کانفرنس کا انعقاد کیا گیا۔ کانفرنس سے مجلس وحدت مسلمین پاکستان کے مرکزی ڈپٹی سیکریٹری جنرل علامہ سید احمد اقبال رضوی، علامہ مختار احمد امامی، وارثان شہداء کمیٹی کے چیئرمین علامہ مقصود علی ڈومکی اور دیگر نے خطاب کیا۔ وارثان شہداء کمیٹی کے زیراہتمام کانفرنس سے خطاب میں مقررین نے کہا کہ 7سال کا طویل عرصہ گذر جانے کے باوجود ان شہداء کی یاد، فکر اور پیغام آج بھی زندہ ہے۔مقررین نے کہا کہ شہداء کے وارث انصاف کے لئے حکمرانوں سے اپیل کر رہے ہیں، مگر انصاف ملنا تو دور کی بات سارے قاتل دہشت گردوں کو باعزت بری کرکے عدل و انصاف کا قتل کیا گیا، ہم مسلسل مطالبہ کرتے رہے کہ سانحہ جیکب آباد، شکارپور اور سہیون شریف کو فوجی عدالتوں میں بھیجا جائے، تاکہ عوام کو پتہ چلے کہ فوجی عدالتیں عوام کے لئے بنی ہیں، مگر ملک کا کوئی ادارہ ہمیں انصاف دینے کے لئے تیار نہیں، قاتل دہشت گرد آزاد ہیں، اس لئے دہشت گردی ختم نہیں ہو رہی۔ شہدائے راہ حق کے پاکیزہ لہو سے ہم نے جو عہد کیا تھا، اسے پورا کریں گے۔
