غزہ میں روایتی جنگ نہیں نسل کشی ہورہی ہے، برازیلین صدر

برازیلیہ : برازیل کے صدر لولا ڈی سلوا نے اسرائیلی جارحیت کی مذمت کرتے ہوئے کہا ہے کہ غزہ میں جو کچھ ہو رہا ہے وہ روایتی جنگ نہیں بلکہ نسل کشی ہے۔ برازیلی صدر نے کہاکہ غزہ کے علاقے میں اسرائیل کی بمباری اقوام متحدہ اور عالمی رہنماؤں کی ناکامی ہے۔ سلامتی کونسل کی اپنے فیصلوں کو نافذ کرنے میں ناکامی غزہ پر جاری بمباری کی وجہ ہے۔ انہوں نے کہاکہ اگر ہمارے پاس سچے رہنما ہوتے اور کوئی ایسا ادارہ ہوتا جسکے فیصلوں کا احترام کیا جاتا تو یہ جنگ نہیں ہوتی۔ انہوں نے غزہ میں بچوں سمیت ہزاروں ہلاکتوں اوراسپتالوں پر بمباری کو پاگل پن قرار دیا۔ انہوں نے کہا کہ اسرائیل کواپنے دفاع کا حق حاصل ہے لیکن معصوم خواتین اور بچوں کا غیر ضروری قتل قابل مذمت ہے۔انہوں نے تنازعہ کے سفارتی حل پر زور دیتے ہوئے امریکی صدر جو بائیڈن کو بھی تنقید کا نشانہ بنایا اور کہاکہ ان کے اندر لڑائی کو روکنے کے لیے حساسیت کا فقدان ہے۔