غزہ: جنگ بندی کا دوسرا روز، 13 اسرائیلی، 4 تھائی، 39 فلسطینی رہا

غزہ : غزہ میں عارضی جنگ بندی کے دوسرے روز حماس نے سترہ یرغمالی اور اسرائیل نے انتالیس فلسطینی رہاکردئے۔ حماس نے پاکستانی وقت کے مطابق رات ساڑھے تین بجے کے قریب 13 اسرائیلی اور 4 تھائی باشندوں کو ریڈ کراس کے حوالے کیا۔ اسرائیلیوں میں 5 خواتین اور 8 بچے شامل ہیں۔ یرغمالیوں کی رہائی کے بعد اسرائیل نے عوفر جیل سے 39 فلسطینی قیدی رہا کردئیے۔ رہائی کے بعد فلسطینی قیدی مغربی کنارے کے علاقے بیتونیا پہنچے جہاں ان کا پرتپاک استقبال کیا گیا۔ رہائی پانیوالوں میں 33 بچے اور 6 خواتین شامل ہیں۔
اسرائیل کی جانب سے معاہدے کی خلاف ورزی کی وجہ سے اسیروں کی رہائی کا عمل تاخیر کا شکار ہوا۔ تاہم قطر اور مصر کے دونوں فریقوں کے ساتھ رابطوں کے ذریعے رکاوٹوں کو دور کرلیا گیا۔ حماس کے عسکری ونگ القسام بریگیڈ نے کہاتھا کہ اسرائیل معاہدے کی پاسداری نہیں کر رہا۔ جب تک شمالی غزہ میں امدادی ٹرکوں کو داخلے کی اجازت نہیں دی جائے گی یرغمالیوں کو رہا نہیں کیا جائے گا معاہدے کے تحت اسرائیل کو شمالی غزہ میں امدادی ٹرکوں کی رسائی دینی ہوگی۔