غزہ فلسطینی ریاست کا لازمی حصہ ،کوئی سمجھوتہ نہیں ہوگا، محمود عباس

رام اللہ : صدر محمود عباس نے دوٹوک الفاظ میں کہا ہےکہ غزہ فلسطینی ریاست کا لازمی حصہ ہے اور اس پر کوئی سمجھوتہ نہیں ہوگا۔ الفتح کے سالانہ اجلاس سے خطاب میں محمود عباس نے کہا کہ فلسطینی ترجیحات میں جنگ بندی کا استحکام اور غزہ میں فوری انسانی امداد کی بلا تعطل فراہمی سرفہرست ہے۔ انہوں نے امریکی صدر ڈونلڈ ٹرمپ کی تجویز کردہ منصوبے کے دوسرے مرحلے پر عملدرآمد شروع کرنے کی ضرورت پر زور دیا، جس میں غزہ سے مکمل اسرائیلی انخلا، حماس کی جانب سے حکمرانی چھوڑنا اور فلسطینی حکومت کے ماتحت عبوری انتظامی کمیٹی کا قیام شامل ہے۔ صدر عباس نے عالمی برادری سے مطالبہ کیا کہ وہ اسرائیل پر دباؤ ڈالے تاکہ یکطرفہ اقدامات روکے جائیں اور فلسطین کی آزادی و خودمختاری کے لیے سنجیدہ سیاسی عمل کی راہ ہموار ہو۔