غزہ میں صرف دو ہفتے کے لیے خوراک کا ذخیرہ رہ گیا

جنیوا : اقوام متحدہ نے خبردار کیا ہے کہ غزہ میں صرف دو ہفتے کے لیے خوراک کا ذخیرہ بچا ہے۔ اقوام متحدہ کے ادارہ برائے خوراک نے کہا ہے کہ اس کے پاس خوراک کا فقط اتنا سامان موجود ہے کہ دو ہفتوں سے بھی کم وقت تک لوگوں کی ضرورت پوری کر سکتا ہے۔ غزہ کی پٹی میں عوامی کچن اور بیکریوں کو دو ہفتوں سے بھی کم وقت کے لیے کھلا رکھنے کے لیے کافی خوراک کی فراہمی ہے۔ ورلڈ فوڈ پروگرام کی جانب سے بتایا گیا کہ اس کے پاس خوراک کے ذخائر کم ہیں جبکہ ایندھن کا ذخیرہ بھی چند ہفتے تک ہی چل سکے گا۔
اسرائیل نے اتوار کو سپلائی بند کرنے کا اعلان کیا تھا جس کا مقصد حماس پر دباؤ ڈالنا ہے تاکہ اس کو جنگ بندی کے متبادل کے طور پر کچھ امور کو تسلیم کرنے پر مجبور کیا جا سکے۔