حزب اللہ کمانڈر ہیثم الطباطبائی اور ساتھیوں کی نماز جنازہ ادا

بیروت : اسرائیلی حملے میں شہید حزب اللہ کے کمانڈر ہیثم الطباطبائی اور ساتھیوں کی نماز جنازہ ادا کردی گئی۔ حزب اللہ کے مجاہدین، علما اور مقامی برادری کے ہزاروں سوگواروں نے شرکت کی۔ اس موقع پر فضا اللہ اکبر کے نعروں سے گونجتی رہی۔
شرکا نے شہادتوں کے باوجود مزاحمت کے مشن سے پیچھے نہ ہٹنے اور شہداء کے راستے پر چلتے رہنے کا عہد کیا۔ حزب اللہ رہنما شیخ علی دعموش نے تقریب سے خطاب میں شہید کمانڈر ہیثم الطباطبائی کی خدمات کو زبردست خراجِ تحسین پیش کیا۔ انہوں نے کہا کہ طباطبائی مزاحمت کی تمام بڑی لڑائیوں کے مرکزی معماروں میں سے تھے۔ انہیں ’آرکیٹیکٹ آف لبریشن اینڈ وکٹری‘ کہنا کوئی مبالغہ نہیں۔ شیخ دعموش کے مطابق وہ ان اعلیٰ ترین رہنماؤں میں شامل تھے جنہوں نے پیپل آف مائٹ کی لڑائی کو غیر معمولی جرأت کے ساتھ لیڈ کیا۔ دعموش نے کہا کہ طباطبائی کی جدوجہد مزاحمت کی تاریخ کا ایک روشن باب ہے جو آنے والی نسلوں کیلئے مثال رہے گا۔ انہوں نے اس عزم کا اعادہ کیا کہ مزاحمت اپنے شہداء کی قربانیوں کو مشعلِ راہ بناتے ہوئے اپنے راستے پر ثابت قدم رہے گی۔