فرانس دہشت گردوں کی حمایت کے بجائے اپنے لوگوں کے مطالبات پر توجہ دے، ایران

تہران: ایران کی وزارت خارجہ نے جلاوطن دہشت گرد گروپ منافقین خلق کے اجلاس کی میزبانی کرنے پر فرانس کو کڑی تنقید کا نشانہ بنایا ہے۔ ترجمان نے کہاکہ فرانسیسی حکومت دہشت گرد گروہوں کی حمایت کے بجائے اپنے ہی لوگوں کے مطالبات پر دھیان دے۔ تنظیم نے پیرس کے نواح میں ایک اجلاس منعقد کیا اور اس گروپ کے ہزاروں حامیوں نے فرانسیسی دارالحکومت کے مرکز میں ایک ریلی نکالی۔ سابق امریکی نائب صدر مائیک پینس اور برطانیہ کی سابق وزیر اعظم لز ٹرس نے اس اجلاس میں شرکت کی۔اس پر فرانسیسی پولیس نے ابتدائی طور پر پابندی عائد کردی تھی۔ ایران کی وزارت خارجہ کے ترجمان ناصر کنعانی نے فرانسیسی حکومت کے اجلاس کی میزبانی کے فیصلے کی شدید مذمت کی۔
انھوں نے کہا کہ ایرانی عوام کے قاتلوں کی حمایت میں ماضی کی سنگین غلطیوں کی تلافی کرنے کے بجائے فرانسیسی سیاستدان دہشت گردوں کے جمع ہونے کے لیے میدان مہیا کر رہے ہیں۔ گذشتہ ماہ البانوی حکام نے مجاہدین خلق کے کیمپ پر چھاپہ مارا تھا اور الزام عائد کیا تھا کہ اس گروپ پر غیر ملکی اداروں کے خلاف سائبرحملے کرنے کا شبہ ہے۔