Raza Musani 
راولپنڈی: خفیہ ایجنسی انٹر سروسز انٹیلی جنس آئی ایس آئی کے سابق ڈی جی جنرل ریٹائرڈ فیض حمید کو فوجی تحویل میں لے لیا گیا ہے۔ جنرل فیض حمید کے خلاف سپریم کورٹ کے حکم پر ٹاپ سٹی ہاؤسنگ سوسائٹی کی کورٹ آف انکوائری شروع کی گئی ہے۔ ان کے خلاف آرمی ایکٹ کی کئی خلاف ورزیاں ثابت ہوچکی ہیں، جس پر انہیں تحویل میں لے کر ان کے خلاف فیلڈ جنرل کورٹ مارشل کا عمل شروع کردیا گیا ہے۔ واضح رہے کہ سپریم کورٹ نے 8 نومبر 2023 کو ایک نجی ہاؤسنگ سوسائٹی کے مالک معیز خان کی درخواست نمٹاتے ہوئے کہاتھا کہ درخواست گذار وزارت دفاع سمیت متعلقہ فورم سے رجوع کریں۔ معیز احمد خان نے الزام لگایا تھا کہ جنرل ریٹائرڈ فیض حمید نے اپنے عہدے کا غلط استعمال کیا اور ان کے حکم پر ان کے اور ان کے خاندان کے خلاف جرائم کا ارتکاب کیا گیا۔ دہشت گردی کے جھوٹے کیس میں ٹاپ سٹی کے دفتر اور معیز خان کی رہائش گاہ پر چھاپہ مارا اور سونے اور ہیروں کے زیورات اور رقم سمیت قیمتی سامان لوٹ لیا۔ ان پر ہاؤسنگ سوسائٹی کے غیر قانونی قبضے میں ملوث ہونے کا الزام ہے۔
