Raza Musani 
لاہور : جمعیت علمائے پاکستان (سواد اعظم) کے مرکزی صدر پیر سید محمد محفوظ مشہدی نے واضح کیا ہے کہ سیدہ کائنات خاتون جنت رسول حضرت فاطمہ زہرا سلام اللہ علیہا کے گستاخوں کی توبہ کرنے تک معافی ممکن نہیں، اہلسنت علماء و مشائخ سیدہ کائنات کی ناموس پر جان قربان کرنے کو بھی تیار ہیں۔ مرکزی سیکرٹریٹ میں کارکنوں سے گفتگو کرتے ہوئے پیر محفوظ مشہدی نے کہا ناموس آل رسول کا تحفظ کیا جائے گا۔ آستانہ عالیہ بھرچونڈی شریف نے ہمیشہ دین اسلام کی سربلندی اور نظام مصطفی کے قیام کیلئے متحرک کردار ادا کیا۔ بھرچونڈی شریف کے بزرگوں کی دینی و ملی خدمات ہمیشہ یاد رکھی جائیں گی۔ اس موقع پر واجد علی گیلانی نے کہا کہ آستانہ عالیہ بھرچونڈی شریف نے سب سے پہلے خاتون جنت کی گستاخی پر آواز بلند کی اور واضح کیا کہ آل رسول کی ناموس کیلئے جان بھی قربان کر سکتے ہیں، گستاخی برداشت نہیں کریں گے۔ واجد علی گیلانی کی پیش کردہ قرارداد کو منظور کر لیا گیا جس میں اسلام کے فروغ اور ناموس رسالت کیلئے خدمات سرانجام دینے پر پیر عرفان شاہ مشہدی، آصف شاہ گیلانی، پیر پگاڑو کے پیر و مرشد صاحبزادہ محمود النبی قادری، صاحبزادہ سائیں اسرا، دیوان احمد مسعود چشتی اور دیگر آستانوں کے گدی نشینوں کو خراج تحسین پیش کیا، جنہوں نے سیدہ کائنات کے گستاخوں کوبے نقاب کرنے میں اپنا کردار ادا کیا۔
