بھاری قیمت چکانے پر مجبور کرنا ہی اسرائیلی جارحیت روکنے کا واحد راستہ ہے، حماس

غزہ : حماس کے عسکری ونگ القسام بریگیڈ کے ترجمان ابو عبیدہ نے اسرائیلی پر ایرانی حملوں کو سراہتے ہوئے کہاہےکہ دشمن کو بھاری قیمت چکانے پر مجبور کرنا ہی جارحیت روکنے کا واحد راستہ ہے۔ترجمان ابو عبیدہ نے کہا کہ ایران نے اپنے حملوں میں نئی حکمت عملی اپناتے ہوئے قابض ریاست کے اندرونی علاقوں کو نشانہ بنایا۔ یہ حملے ایران کے خلاف امریکہ اور قابض اسرائیل کی جارحیت اور غزہ میں فلسطینی عوام کے خلاف جاری نسل کشی کی سفاکیت کا ایک فطری ردعمل ہیں۔ ابو عبیدہ نے اس بات پر زور دیا کہ قابض دشمن طاقت کے سوا کوئی زبان نہیں سمجھتا۔ اگر دشمن کو لگام نہ دی گئی تو وہ خطے کے ممالک کے خلاف اپنی جارحانہ پالیسیوں میں مزید حد سے تجاوز کرے گا۔ انہوں نے ایران کے کردار کو سراہتے ہوئے کہا کہ ایران امت مسلمہ کے لیے دفاع کی پہلی لائن کی حیثیت رکھتا ہے اور حملہ آور قوتیں کبھی بھی اقوام کے عزم کو توڑنے میں کامیاب نہیں ہوں گی۔