قومی سلامتی کو نقصان پہنچنے کا خوف، امریکا نے یوکرین کو مسلح ڈرونز کی فروخت روک دی

واشنگٹن : امریکا نے حفاظتی خدشات کے پیش نظر یوکرین کو چار بڑے مسلح ڈرونز کی فروخت روک دی ہے۔ امریکی محکمہ دفاع نے ڈرونز کی فروخت پر اعتراض اٹھاتے ہوئے اس خدشے کا اظہار کیا تھا کہ یہ دشمنوں کے ہاتھوں میں بھی جا سکتے ہیں۔ یوکرین کو مسلح ڈرونز ’گرے ایگلز‘ فروخت کرنے کے فیصلے کی منظوری وائٹ ہاؤس دے چکا ہے۔ محکمہ دفاع کے مطابق ڈرونز میں نصب راڈار اور نگرانی کے آلات تک اگر روس کو رسائی مل گئی تو یہ امریکہ کی سیکیورٹی کے لیے خطرے کا باعث بن سکتا ہے۔ اس سے قبل ان خدشات کو نظر انداز کیا گیا تھا تاہم گزشتہ ہفتے محکمہ دفاع کے اجلاسوں میں انہیں اٹھایا گیا ہے جس کے بعد یوکرین کو ان کی فروخت فی الحال روک دی گئی ہے۔ محکمہ دفاع کے ترجمان سو گوف کا کہنا ہے کہ امریکی دفاعی سامان کی دوسرے ممالک کو ٹرانسفر سے قبل ٹیکنالوجی کی سیکیورٹی کا جائزہ لینا ایک معمول کا عمل ہے اور تمام کیسز کا فیصلہ میرٹ کی بنیاد پر ہوتا ہے۔ محکمہ دفاع کے اعلیٰ حکام یوکرین کے ساتھ ہونے والے اس معاہدے کا جائزہ لے رہے ہیں جس کے بعد اس سے متعلق کوئی فیصلہ کیا جائے گا۔جدید ٹیکنالوجی سے لیس ان ڈرونز میں ہیل فائر میزائل بھی نصب کیے جا سکتے ہیں جو یوکرین جنگ کے دوران روس کے خلاف استعمال کر سکتا ہے۔امریکی فوج کی بجٹ دستاویزات کے مطابق ایک ڈرون کی قیمت 10 ملین ڈالر ہے۔