Raza Musani 
جنیوا : ریڈ کراس کی بین الاقوامی کمیٹی نے اسرائیل اور حماس پر زور دیا ہے کہ وہ غزہ میں جنگ بندی برقرار رکھیں تاکہ تنازعات کے شکار خطے میں دوبارہ مایوسی پھیلنے سے بچا جا سکے۔ ریڈ کراس کی بین الاقوامی کمیٹی کی صدر مرجانا سپولجارک نے ایک بیان میں کہا کہ جنگ بندی معاہدے سے بے شمار جانیں بچی ہیں اور ناقابلِ تصور تکالیف کے درمیان امید کی کرن پیدا ہوئی ہے۔ گذشتہ چھے ہفتوں کے دوران معاملات آگے بڑھے ہیں جن کے کسی بھی انہدام سے لوگوں کے دوبارہ مایوسی میں ڈوب جانے کا خدشہ ہے۔ انہوں نے کہا کہ ریڈ کراس نے جنگ بندی معاہدے کے تحت یرغمالیوں اور زیر حراست افراد کی بحفاظت واپسی میں سہولت فراہم کی اور ایسا کرنے کے لیے تیار ہے۔ ان کوششوں نے خاندانوں کو دوبارہ جوڑ دیا ہے اور اس بات کو یقینی بنایا ہے کہ پیاروں کو وقار کے ساتھ سپرد خاک کیا جائے۔
انہوں نے زور دے کر کہا کہ جنگ بندی کو برقرار رکھنے کے لیے ہر ممکن کوشش کی جانی چاہیے تاکہ جانیں دشمنی سے بچ سکیں، انسانی امداد غزہ میں داخل ہو اور مزید خاندانوں کو دوبارہ ملایا جا سکے۔
