Raza Musani 
غزہ : صیہونی فوج نے رفح میں بڑے زمینی آپریشن کیلئے بیشتر علاقوں سے انخلا کے احکامات جاری کردئے۔ اسرائیلی فوج نے فلسطینیوں کو حکم دیا ہے کہ وہ ساحل کے ساتھ پھیلی ہوئی خیمہ بستیوں سے مواصی کے علاقے کی جانب نقل مکانی کریں۔ انتباہ کے ساتھ ایک تفصیلی نقشہ بھی دیا گیا ہے جس میں ان علاقوں کی فہرست دی گئی تھی جہاں سے انخلاء کرنا ہے۔اسرائیلی احکامات کے بعد فلسطینی جان بچانے کیلئے رفح سے انخلا کررہے ہیں۔ فلسطینی وزارت داخلہ نے ایک بیان میں کہا ہے کہ انخلا کے نئے خطرات ممکنہ طور پر تباہ کن حالات کو مزید بڑھا سکتے ہیں جس سے صورتحال سنگین ہوجائے گی۔ بیان میں عالمی برادری اور ثالثوں سے مطالبہ کیا گیا کہ وہ رفح گورنری میں بے دخلی کے خطرات کو روکنے کے لیے فوری طور پر مداخلت کریں۔
