یورپی رہنماؤں کا روس سے یوکرین میں ایک ماہ کی جنگ بندی کا مطالبہ

کیف: یورپی ممالک نے روس سے ایک ماہ کی جنگ بندی کا مطالبہ کیا ہے۔ جبکہ روسی صدر پیوٹن نے یوکرین کو براہ راست مذاکرات کی پیشکش کردی۔ یوکرین کے دارالحکومت کیف میں برطانیہ۔ جرمنی۔ فرانس۔ اور پولینڈ کے رہنماؤں کا اجلاس ہوا۔ جبکہ کئی ممالک کے رہنما آن لائن شریک ہوئے۔ اجلاس کے بعد یورپی رہنماؤں نے نیوز کانفرنس میں روس پر زور دیا کہ وہ یوکرین کے ساتھ پیرچسے شروع ہونے والی تیس دن کی غیر مشروط جنگ بندی پر رضامند ہو۔ انہوں نے خبردار کیا کہ اگر ماسکو نے جنگ بندی پر عمل نہیں کیا تو اس پر نئی اور وسیع پابندیاں عائد کی جائیں گی۔
ادھر روسی صدر پیوٹن نے یورپی رہنماؤں کا مطالبہ نظر انداز کرتے ہوئے یوکرین کو براہ راست مذاکرات کی پیش کش کردی۔ پیوٹن نے کہا کہ براہ راست مذاکرات 15 مئی کو استنبول میں شروع ہوں گے۔ انہوں نے کہا کہ تنازعات کی بنیادی وجوہات کو ختم کرنے کی ضرورت ہے۔