یورپی یونین سے اسرائیل کیساتھ تجارتی معاہدہ معطل کرنے پر زور

جنیوا: اقوام متحدہ کے ماہرین نے یورپی یونین سے مطالبہ کیا ہے کہ وہ انسانی حقوق کی مبینہ خلاف ورزیوں پر اسرائیل کے ساتھ تجارتی معاہدہ فوری طور پر معطل کرے۔ اقوام متحدہ کے انسانی حقوق کے ماہرین نے کہا ہے کہ یورپی یونین کو اسرائیل کے ساتھ یورپی-اسرائیل ایسوسی ایشن معاہدہ فوری طور پر مکمل یا جزوی طور پر معطل کرنا چاہیے۔ ماہرین کےمطابق یہ معاہدہ اسرائیل کو یورپی منڈی تک ترجیحی رسائی دیتا ہے۔ جبکہ مختلف بین الاقوامی ادارے اسرائیل پر انسانی حقوق کی سنگین خلاف ورزیوں، جنگی جرائم اور نسل کشی جیسے الزامات عائد کر چکے ہیں۔ ماہرین نے کہا کہ یورپی یونین کے وزرائے خارجہ کا اجلاس لکسمبرگ میں ایسے وقت ہو رہا ہے جب یورپ میں عوامی سطح پر احتساب کا مطالبہ بڑھ رہا ہے۔ ان کے مطابق یورپی شہریوں کی ایک بڑی مہم میں اب تک دس لاکھ سے زائد دستخط جمع ہو چکے ہیں جن میں معاہدے کی مکمل معطلی کا مطالبہ کیا گیا ہے۔