پنجاب میں بجلی 14 روپے سستی، 200 یونٹ والے صارفین ریلیف سے محروم

لاہور: پنجاب حکومت کی جانب سے بجلی صارفین کو 14 روپے فی یونٹ ریلیف 200 یونٹ تک استعمال کرنے والے صارفین کو نہیں ملے گا۔
ذرائع کا بتانا ہے کہ حکومت کی جانب سے ماہانہ 200 یونٹ استعمال کرنے والوں کیلئے بجلی مہنگی نہیں کی گئی تھی، 200 یونٹ تک استعمال کرنے والوں کا پہلے ہی پروٹیکٹڈ صارفین میں شمار ہوتا ہے۔
پنحاب حکومت کے مطابق 201 یونٹ سے 500 یونٹ والے صارفین کو بجلی کے بلوں میں 14 روپے ریلیف دیا جائے گا، کل یونٹ اور تمام ٹیکسز شامل کرنے کے بعد فی یونٹ سے 14 روپے مائنس کر دیئے جائیں گے، ٹیکسز ڈال کر فی یونٹ 44 روپے کا بنتا ہے تو اس میں سے 14 روپے کا ریلیف ملے گا، یوں ریلیف کے بعد صارف کو 30 روپے فی یونٹ ادا کرنا ہوں گے۔
ذرائع کے مطابق بجلی کے ٹیرف میں ریلیف کا اطلاق اگست اور ستمبر 2024 کے بلوں میں ہوگا۔ ترجمان صوبائی حکومت کے مطابق وزیراعلیٰ پنجاب کی ہدایت پر کام شروع کر دیا گیا ہے۔
یاد رہے کہ دو روز قبل مسلم لیگ ن کے صدر نواز شریف نے وزیراعلیٰ پنجاب مریم نواز کے ہمراہ پریس کانفرنس کرتے ہوئے صوبے میں 500 یونٹ تک بجلی استعمال کرنے والوں کو 2 ماہ کیلئے 14 روپے فی یونٹ تک ریلیف دینے کا اعلان کیا تھا۔