مصر نے غزہ کی تعمیر نو کا جامع اور متبادل منصوبہ تیار کرلیا

قاہرہ : مصر نے غزہ کی تعمیر نو کا ایک جامع اور متبادل منصوبہ تیار کرلیا ہے۔ مصر کی وزارت خارجہ نے کہا کہ مصر ایک جامع تجویز پیش کرنے کا ارادہ رکھتا ہے جس میں غزہ کی تعمیر نو پر توجہ مرکوز کی جائے گی اور اس بات کو یقینی بنایا جائے گا کہ فلسطینی اپنے وطن میں رہیں۔ وزارت خارجہ نے زور دے کر کہا کہ قاہرہ امریکی صدر ڈونلڈ ٹرمپ کے ساتھ فلسطینی کاز کے منصفانہ حل تک پہنچنے کے لیے تعاون کرے گا جس میں خطے کے لوگوں کے حقوق کو مدنظر رکھا جائے۔ وزارت خارجہ کے بیان میں کہا گیا ہے کہ مسئلہ فلسطین کے کسی بھی حل میں خطے میں امن کے فوائد کو خطرے میں ڈالنے سے گریز کرنا چاہیے.
القہرہ نیوز نے مصری حکام کا حوالہ دیتے ہوئے کہا کہ قاہرہ نے غزہ کی پٹی سے فلسطینیوں کو دوبارہ آباد کرنے سے انکار کی تصدیق کر دی ہے اور وہ اس مضبوط موقف پر قائم ہے۔