تعلیم یافتہ ووٹرز پی ٹی آئی کے حامی، ن لیگ اور پی پی ناخواندہ افراد میں مقبول

اسلام آباد: پاکستان تحریک انصاف کے حامیوں میں تعلیم یافتہ نوجوان ووٹرز شامل ہیں۔ گیلپ پاکستان کے ایگزٹ پول کے مطابق حکمران اتحاد میں شامل دو بڑی جماعتیں ن لیگ اور پی پی نا خواندہ اور مڈل پاس ووٹرز میں مقبول ہے۔
سروے رپورٹ کے مطابق پی ٹی آئی کے 41 فیصد ووٹرز میں 18 سے 24 سال کے ہائی اسکول یا اس سے زیادہ تعلیم یافتہ نوجوان شامل ہیں جبکہ ن لیگ کو اس طبقے کے 21 فیصد افراد نے ووٹ دیا۔ ایگزٹ پول کے مطابق بیچلرز اور ماسٹرز ڈگری رکھنے والے 35 فیصد لوگ پی ٹی آئی کے ووٹرز ہیں جبکہ ن لیگ کو 15 فیصد جبکہ پی پی کو 10 فیصد نے ووٹ دیا۔ رپورٹ کے مطابق ناخواندہ افراد میں ن لیگ اور پیپلز پارٹی کا ووٹ بینک زیادہ ہے۔ 29 فیصد نے ن لیگ اور 23 فیصد نے پیپلز پارٹی کو ووٹ دیا جبکہ پی ٹی آئی 21 فیصد ناخواندہ افراد کا ووٹ حاصل کرسکی۔ ایگزٹ پول کے مطابق مڈل پاس 31 فیصد ووٹرز ن لیگ کے ساتھ ہیں، 26 فیصد نے پی ٹی آئی اور 15 فیصد نے پیپلز پارٹی کو ووٹ دیا۔