Raza Musani 
پشاور: ملک کے مختلف علاقوں میں زلزلے سے نو افراد جاں بحق اور درجنوں زخمی ہوگئے۔زلزلے کے جھٹکے افغانستان۔ ہندوستان سمیت خطے کے کئی ممالک میں محسوس کئے گئے۔ پاکستان میں رات 9 بجکر 48 منٹ پر آنے والے زلزلے سے صوبہ خیبر پختونخوا لرز گیا۔ وفاقی دارالحکومت اسلام آباد اور گلگت بلتستان اور شمالی علاقوں میں شدید زلزلے سے کئی شہروں کی عمارتوں میں دراڑیں پڑگئیں۔ سوات میں سب سے زیادہ نقصان ہوا جہاں کئی مکانات گرگئے۔ ریکٹر اسکیل پر زلزلے کی شدت 6.8 ریکارڈ کی گئی ہے۔ زلزلے کا مرکز افغانستان کے کوہ ہندو کش اور گہرائی 180 کلومیٹر تھی۔ آفٹر شاکس کے سلسلے سے شہریوں میں خوف وہراس پھیل گیا۔ کوہستان میں زلزے کے باعث لینڈ سلائیڈنگ کے نتیجے میں شاہراہ قراقرم بند ہوگئی۔ترکمانستان، ہندوستان، قازقستان، تاجکستان، ازبکستان، چین اور کرغزستان میں بھی زلزلے کےجھٹکے محسوس کیے گئے ہندوستان میں زلزلے کا اثر دہلی۔ اتر پردیش، جموں کشمیر، اتراکھنڈ، ہماچل پردیش، پنجاب اور مدھیہ پردیش میں دیکھا گیا۔ ہندوستان میں جان و مال کے نقصان کی کوئی اطلاع موصول نہیں ہوئی۔ افغانستان میں زلزلے سے دو افرادجاں بحق اور کئی زخمی ہوئے۔
