امریکا اور فرانس کے 150 سے زائد ارکان پارلیمنٹ کا اسرائیل کو ہتھیار کی فروخت روکنے کا مطالبہ

پیرس: امریکا اور فرانس کے ڈیڑھ سو سے زائد ارکان پارلیمنٹ نے اسرائیل کو ہتھیاروں کی فروخت روکنے کا مطالبہ کردیا۔
فرانسیسی پارلیمنٹ کے 115 ارکان نے صدر ایمانویل میکرون کو خط لکھ دیا، جس میں اسرائیل کو ہتھیار بیچنے پر پابندی عائد کرنے کا مطالبہ کیا ہے۔ پارلیمانی مراسلے میں کہا گیا کہ غزہ میں اسرائیلی فورسز کے وحشیانہ حملوں کے باعث شہادتیں 33 ہزار سے تجاوز کرگئیں۔ فرانس کو اسرائیل کی بدترین نسل کشی مہم میں شریک نہیں بننا چاہیے۔انہوں نے اسرائیل کو فراہم کردہ ہتھیاروں کی تفصیلات پارلیمنٹ میں پیش کرنے کا بھی مطالبہ کیا۔اس سے پہلے امریکی کانگریس کے چالیس ارکان نے صدر جوبائیڈن اور وزیرخارجہ انٹونی بلنکن کو خط لکھ کر اسرائیل کو اسلحہ کی فراہمی بند کرنے کا مطالبہ کیا تھا۔