انتخابات میں شکست، جہانگیر ترین اور سراج الحق مستعفی

اسلام آباد: انتخابات میں شکست پر دو جماعتوں کے سربراہوں نے استعفی دے دیا۔ پاکستان کے سابق وزیراعظم کی جماعت کو توڑ کر بنائی گئی استحکام پاکستان پارٹی کے سربراہ جہانگیر ترین نے اپنے استعفی کا اعلان اپنی ٹوئٹ میں کیا۔ انہوں نے سیاست سے کنارہ کشی کا بھی اعلان کیا۔ جہانگیر ترین نے لکھا کہ اللہ کرے آئندہ چند برس میں پاکستان مستحکم ہو۔ ذاتی حیثیت میں پاکستان کی خدمت کرتا رہوں گا۔ حالیہ الیکشن میں جہانگیر ترین قومی اسمبلی کی دو نشستوں سے کھڑے ہوئے تھے اور دونوں ہی ہارگئے تھے جبکہ ان کی جماعت قومی اسمبلی کی ایک اور پنجاب اسمبلی کی دو نشستیں جیت سکی۔
ادھر جماعت اسلامی کے امیر سراج الحق نے بھی الیکشن میں ناکامی پر پارٹی کی سربراہی سے استعفیٰ دے دیا۔ سراج الحق نے کہاکہ میں الیکشن میں ناکامی کی ذمہ داری قبول کرتا ہوں جماعت اسلامی عام انتخابات میں خاطر خواہ کارکردگی کا مظاہرہ نہیں کرسکی اس لیے میں اپنی ناکامی قبول کرتا ہوں۔