آئندہ سال جنوری تک پاکستان میں فائیو جی سروس شروع کرنے کا فیصلہ

حیدرآباد: وزیر انفارمیشن ٹیکنالوجی سید امین الحق نے کہا ہے کہ رواں سال دسمبر یا پھر آئندہ سال جنوری تک پاکستان میں فائیو جی سروس شروع ہوجائے گی۔ حیدرآباد میں نیشنل انکیوبیشن سینٹر کے قیام سے متعلق سندھ یونیورسٹی کے ساتھ معاہدے کی تقریب سے خطاب میں وزیر آئی ٹی سید امین الحق نے کہا کہ شہر کے قلب میں 13 ہزار اسکوائر فٹ پر محیط ایلسا قاضی کیمپس میں رواں سال موسم گرما تک سینٹر کا قیام کیا جائے گا، اس حوالے سے ہونے والے معاہدے پر وزارت آئی ٹی کے ادارے اگنائٹ کے چیف ایگزیکٹیو عاصم شہریار حسین اور سندھ یونیورسٹی کے وائس چانسلر ڈاکٹر محمد صدیق نے دستخط کیے۔امین الحق کا کہنا تھا کہ نیشنل انکوبیشن سینٹر کے قیام سے حیدرآباد اور اس کے گردو ونواح کے نوجوانوں کو ایک ایسا پلیٹ فارم میسر آئے گا جہاں سے وہ دنیا کو اپنی تخلیقی صلاحیتوں سے روشناس کرانے کے علاوہ پرکشش آمدنی کے ذریعے ایک بہترین مستقبل کی بنیاد رکھ سکیں گے، حکومت پاکستان کے ڈیجیٹل پاکستان کے وژن کو آگے بڑھانے اور کاروباری افراد کو سازگار ماحول کی فراہمی کے لیے مزید چھوٹے شہروں میں نیشنل انکوبیشن سینٹرز کا قیام ترجیحات میں شامل ہے۔