احتجاج کو ریاستی طاقت سے کچلنا ن لیگ کی سیاست کا شرمناک وطیرہ ہے، ترجمان ایم ڈبلیو ایم

اسلام آباد: ترجمان مجلس وحدت مسلمین پاکستان نے اڈیالہ جیل کے باہر سینیٹر علامہ راجہ ناصر عباس جعفری اور دیگر افراد کیخلاف طاقت کے استعمال کی شدید مذمت کی ہے۔ ترجمان نے کہا ہے کہ احتجاج کرنا ہر شہری کا آئینی، قانونی اور انسانی حق ہے، پرامن احتجاج کو برداشت کرنے کے بجائے اسے ریاستی طاقت کے ذریعے دبانا ن لیگ کی سیاست کا پرانا اور شرمناک وطیرہ ہے۔
ترجمان نے کہا کہ گذشتہ روز اڈیالہ جیل کے باہر جو کچھ ہوا وہ ریاستی بربریت کی ایک اور واضح مثال ہے۔ پرامن مظاہرین پر واٹر کینن کے ذریعے زہریلا اور کیمیائی مادوں سے آلودہ پانی پھینکا گیا۔ بزرگ عالمِ دین اور سربراہ مجلس وحدت مسلمین سینیٹر علامہ راجہ ناصر عباس جعفری کو بھی نشانہ بنایا گیا۔ ترجمان نے کہا کہ قیادت کو معمولی آنچ بھی آئی تو اس کے نتائج کی تمام تر ذمہ داری حکومت پر عائد ہوگی۔ ملتِ تشیع خاموش نہیں رہے گی بلکہ سڑکوں پر آ کر بھرپور اور فیصلہ کن احتجاج کرے گی۔