ملک میں کورونا کیسز کی شرح 3 ماہ کی بلند ترین سطح پر

اسلام آباد : پاکستان میں کورونا کیسز کی شرح تین ماہ کی بلند ترین سطح 2.52 فیصد پر جاپہنچی۔ گزشتہ 24 گھنٹوں کے دوران ملک بھر میں کورونا کے 51145 ٹیسٹ کیے گئے جن میں سے 1293 افراد میں کورونا وائرس کی تصدیق ہوئی جبکہ وائرس سے 6 افراد انتقال کر گئے۔ سرکاری اعداد و شمار کے مطابق کورونا سے ہلاکتوں کی تعداد 28961 ہو گئی ہے اور مجموعی کیسز 13 لاکھ 1141 تک جاپہنچے ہیں۔ این سی اوسی کے مطابق گزشتہ 24 گھنٹوں کے دوران کورونا کیسز کی شرح 2.52 فیصد رہی جو تقریباً 3 ماہ بعد ملک میں کورونا کی سب سے زیادہ شرح ہے۔ ملک بھر میں 239 مریض کورونا سے صحتیاب بھی ہوئے جس کے بعد مجموعی طور پر صحتیاب ہونے والوں کی تعداد 12 لاکھ 58086 ہو گئی ہے۔