Raza Musani 
گلگت: اسلامی تحریک گلگت بلتستان کے آرگنائزر شیخ میرزا علی نے گلگت بلتستان کے سابق چیف جج رانا شمیم کے بیان کی مذمت کرتے ہوئے کہا ہے کہ ذمہ دار حلقوں کی جانب سے گلگت بلتستان کے تکنیکی طور پر پاکستان کا حصہ نہ ہونے کے بیانات بھارتی پروپیگنڈے کی تقویت کا باعث بن رہا ہے۔ رانا شمیم کے بیان سے محب وطن شہریوں کی دل آزاری ہوئی ہے۔ ریاست اس نازک صورت حال میں گلگت بلتستان سے متعلق اپنا موقف واضح کرکے خطہ میں بڑھنے والی بے چینی دور کرے۔ شیخ مرزا علی کا کہنا تھا کہ افسوس کا مقام ہے کہ گلگت بلتستان کو آزادی حاصل کئے 74 سال گزر چکے ہیں، کبھی ہماری آزادی کو معاہدہ کراچی کی صورت میں کسی سے مشروط کیا جاتا ہے تو کبھی ملک کو آئین دیتے وقت نہ صرف نظر انداز کیا جاتا ہے بلکہ جی بی کے لوگوں کو حاصل صدیوں پرانے حقوق بھی چھین لئے جاتے ہیں اور جنگل کا قانون حاوی کیا جاتا ہے۔ انہوں نے مزید کہا کہ گلگت بلتستان کے لوگ اپنے آپ کو پاکستانی سمجھتے تھے، ہیں اور سمجھتے رہیں گے لیکن اس حقیقت کے باوجود تواتر کے ساتھ کبھی وزارت اطلاعات، کبھی وزارت قانون، کبھی وزارت خارجہ کبھی کوئی عہدیدار حقائق کے منافی بیان دیتا ہے، جو نہایت تکلیف دہ ہے۔
