Raza Musani 
بیجنگ : چینی صدر شی جن پنگ نے اپنے روسی ہم منصب ولادیمیر پیوٹن کو یقین دہانی کروائی ہے کہ بیجنگ ماسکو کی خودمختاری اور سلامتی کی حمایت کرتا رہے گا۔ صدر شی جن پنگ نے پیوٹن سے ٹیلیفون پر بات کرتے ہوئے کہا کہ چین روس کی خودمختاری اور سلامتی سے متعلقہ امور میں مشترکہ طور پر تعاون کرسکتا ہے۔ بیجنگ دونوں ممالک کے درمیان اسٹریٹجک تعاون کو مزید بڑھانے کے لیے پرعزم ہے۔ 24 فروری کو روس کی طرف سے یوکرین پر حملے کے بعد سے دونوں رہنماؤں کے درمیان یہ دوسرا ٹیلیفونک رابطہ تھا۔ چین یوکرین جنگ کی مذمت کرنے سے انکار کرچکا ہے۔ رواں سال کے آغاز سے ہونے والی عالمی تبدیلیوں اور بحران کے تناظر میں دونوں ممالک کے بڑھتے ہوئے مشترکہ تعلقات کو چینی صدر نے خوش آئند قرار دیا ہے۔ خیال رہے کہ یورپی یونین اور امریکا نے خبردار کیا تھا کہ یوکرین جنگ پر چین نے روس کی حمایت کی تو چین کے ساتھ تعلقات خراب ہوسکتے ہیں۔چین اور بھارت دو بڑے ممالک ہیں جنہوں نے ماسکو کے خلاف لگنے والی پابندیوں کو نظر انداز کیا ہے اور اس سے اب تک تجارت جاری رکھے ہوئے ہیں۔
