Raza Musani 
دوحہ : اسرائیل اور حماس کے درمیان جنگ بندی مذاکرات تعطل کا شکار ہوگئے ہیں۔ دوحہ میں مذاکرات کے دوران امریکہ نے جنگ بندی کے پہلے مرحلے کو وسط اپریل تک بڑھانے کی تجویز پیش کی تھی۔ امریکی تجویز میں جنگ بندی میں توسیع کے بدلے یرغمالیوں اور اسرائیل کے زیر حراست فلسطینی قیدیوں کا مزید تبادلہ بھی شامل ہے۔اسرائیلی وزیر اعظم بنیامین نیتن یاہو کے دفتر نے کہا ہے کہ وہ جنگ بندی میں توسیع پر حماس کے ساتھ بات چیت جاری رکھنے کے لیے تیار ہے۔ جبکہ حماس نےجنگ بندی کے پہلے مرحلے میں توسیع قبول کرنے سے انکار کردیا ۔ حماس نے ایک بیان میں کہا کہ معاہدے کے تحت جنگ بندی کا دوسرا مرحلہ شروع نہ ہوا تو قیدی رہا نہیں کرینگے۔ اسرائیل کو جنگ بندی کے دوسرے مرحلے کے تحت انسانی امداد بحال کرنا ہوگی اور مصری سرحد سے اپنی افواج کو نکالنا ہوگا۔ امریکا نے حماس کی شرائط کو ناقابل عمل قرار دیکر انہیں مسترد کردیا ہے۔
