غزہ میں جنگ بندی، حماس کی قاہرہ میں مذاکرات سے امیدیں

غزہ : حماس نے غزہ میں جنگ بندی کیلئے قاہرہ میں مذاکرات سے امیدیں باندھ لیں۔ حماس رہنما خلیل الحیا کی قیادت میں وفد نے قاہرہ میں مصری ثالثوں کے ساتھ بات چیت کی۔ حماس کے ایک عہدیدار نے اے ایف پی کو بتایا کہ فلسطینی گروپ کو توقع ہے کہ مصری ثالثوں کے ساتھ ملاقات میں اہم پیش رفت ہوگی۔ ہمیں امید ہے کہ یہ اجلاس جنگ کے خاتمے، جارحیت کو روکنے اور غزہ سے قابض افواج کے مکمل انخلاء کو یقینی بنانے کے معاہدے تک پہنچنے کی جانب حقیقی پیش رفت حاصل کرے گا۔
ادھر حماس نے ایک بیان میں کہا ہےکہ اسرائیل غزہ پر حملوں کے ذریعے یرغمالیوں کی رہائی کی کوششیں کر رہا ہے۔ اسرائیل کے حملے اسیروں کی رہائی کے لیے گروپ پر دباؤ ڈالنے کے لیے خونی پیغام ہیں. بیان میں کہا گیا کہ نتن یاہو اور ان کی حکومت قیدیوں کے تبادلے کے معاہدے کے بغیر قیدیوں کے معاملے پر کوئی پیشرفت نہیں کر سکے گی، یہ قیدیوں کی قیمت پر ایک ہارا ہوا جوا ہے۔