Raza Musani 
واشنگٹن : امریکا نے طالبان حکومت کے وزیرخارجہ امیر خان متقی کی جانب سے افغانستان کے منجمد اثاثے جاری کرنے کی اپیل مستردکردی اور واضح کیا کہ یہ بہت پیچیدہ اور چیلنجنگ معاملہ ہے، منجمد اثاثے جاری نہ کرنے کی کئی وجوہات ہیں، افغان منجمد اثاثے جاری کرنے سے متعلق فی الحال کوئی اپ ڈیٹ نہیں ہے۔ترجمان وائٹ ہاؤس نے کہا کہ منجمد اثاثوں کے بارے میں اتحادیوں، شراکت داروں کیساتھ مل کر جائزہ لے رہے ہیں۔ منجمد اثاثوں کے ناقابل رسائی رہنے کی کئی وجوہات ہیں، افغان منجمد اثاثوں کے حوالے سے نائن الیون متاثرین نے مقدمہ کیا ہوا ہے، طالبان امریکا اور اقوام متحدہ کی جانب سے پابندیوں کی فہرست میں شامل ہے اور طالبان کو فائدہ پہنچائے بغیر افغان عوام تک منجمد اثاثوں کی رسائی بھی بنیادی سوال ہے۔
