غزہ پر حملے رکوانے کے لیے اسرائیل پر بین الاقوامی دباؤ کا مطالبہ

قاہرہ : مصر، اردن اور فرانس کے رہنماؤں نے غزہ میں مہلک حملے بند کرنے کیلئے اسرائیل پر بین الاقوامی دباؤ کا مطالبہ کیا ہے۔ قاہرہ میں سہہ فریقی سربراہ اجلاس میں مصری صدر عبدالفتاح السیسی، فرانسیسی صدر ایمانوئل میکرون اور اردن کے شاہ عبداللہ نے فلسطین کی صورتحال پر تبادلہ خیال کیا۔ اجلاس کے بعد جاری بیان میں فلسطینیوں کے تحفظ کےلیے فوری طور پر جنگ بندی کی طرف واپسی اور فوری طور پر انسانی امداد کی فراہمی کو یقینی بنانے پر زور دیاگیا۔ تینوں سربراہان نے غزہ سے منتقلی کے منصوبے کو مسترد کرتے ہوئے واضح کیا کہ یکطرفہ اقدامات دو ریاستی حل کے حصول کے امکانات کو کمزور کر رہے ہیں۔ شاہ عبداللہ نے خبردار کیا کہ اسرائیل کے مسلسل حملے بحران کے خاتمے کے لیے تمام سفارتی اور انسانی کوششوں کو نقصان پہنچاتے ہیں اور پورا خطہ افراتفری میں ڈوبنے کا خطرہ ہے۔