قاہرہ، حماس کے وفد کی مصری انٹیلی جنس چیف سے ملاقات

قاہرہ : قاہرہ میں حماس رہنما خلیل الحیہ کی زیر قیادت اعلیٰ سطح کے وفد نے مصری انٹیلیجنس چیف حسن رشاد سے ملاقات کی اور جنگ بندی کی اسرائیلی خلاف ورزیوں پر شدید تحفظات کا اظہار کیا ہے۔ حماس کے جاری بیان میں کہا گیا ہے کہ وفد نے حسن رشاد سے ملاقات میں جنگ بندی کے پہلے مرحلے پر مکمل عملدرآمد کے عزم کا اعادہ کیا ہے۔ اور واضح کیا کہ اسرائیل کی مسلسل خلاف ورزیاں معاہدے کو کمزور کرنے کی کوشش ہیں۔
وفد کے سربراہ خلیل الحیہ نے ثالثوں کی نگرانی میں ایک واضح اور جامع میکانزم قائم کرنے کا مطالبہ کیا تاکہ معاہدے کی خلاف ورزیوں کی مؤثر دستاویز بندی اور روک تھام ہو سکے۔ حماس نے ملاقات میں رفح کے ان علاقوں کا مسئلہ بھی اٹھایا جہاں اس کے مزاحمت کاراسرائیلی کنٹرول والے حصوں میں محاصرے کا شکار ہیں۔