Raza Musani 
دی ہیگ: بین الاقوامی فوجداری عدالت کے چیف پراسیکیوٹر کریم خان نے دعویٰ کیا ہے کہ سینئر برطانوی اہلکار نے اسرائیلی قیادت کے خلاف وارنٹس جاری پر عدالت کی فنڈنگ روکنے کی دھمکی دی۔ برطانوی ویب سائٹ مڈل ایسٹ آئی کے مطابق یہ الزام اُس بیان کا حصہ ہے جو کریم خان نے آئی سی سی کی اپیل چیمبر میں جمع کرایا ہے۔ جس میں اسرائیلی قیادت کے خلاف وارنٹس کی درخواست سے قبل دباؤ اور دھمکیوں کی تفصیلات بیان کی گئی ہیں۔ یہ بیان اسرائیل کی اس درخواست کے جواب میں جمع کرایا گیا جس میں کریم خان کو تحقیقات سے ہٹانے اور وارنٹس منسوخ کرنے کا مطالبہ کیا گیا تھا۔ کریم خان نے عہدیدار کا نام لینے سے گریز کیا ہے لیکن برطانوی ویب سائٹ مڈل ایسٹ آئی نے انہیں سابق وزیر خارجہ اور سابق وزیر اعظم ڈیوڈ کیمرون قرار دیا ہے۔
کریم خان کا مؤقف مڈل ایسٹ آئی کی سابقہ رپورٹس کی بھی تصدیق کرتا ہے، جن میں ان پر دباؤ ڈالنے کی مبینہ مہم اور ڈیوڈ کیمرون کی متنازع فون کال کا ذکر کیا گیا تھا۔
