Raza Musani 
سڈنی : آسٹریلیا نے مغربی کنارے کے لیے مقبوضہ فلسطینی علاقے اور اسرائیل کیلئے قابض ریاست کی اصطلاح بحال کردی۔ آسٹریلوی وزیر خارجہ پینی وونگ کے مطابق حکومت نے مقبوضہ مغربی کنارے میں غیر قانونی اسرائیلی بستیوں پر اپنے مؤقف کی توثیق کردی ہے اور کہا کہ اب اسرائیل کو ایک غیر قانونی ریاست اور فلسطینی کے علاقوں کو مقبوضہ کہہ کر پکاریں گے۔ انہوں نے کہا کہ تمام سرکاری دستاویز اور بیانات میں فلسطین کو مقبوضہ اور اسرائیل کو قابض لکھا اور پڑھا جائے گا۔ انہوں نے کہا کہ آسٹریلوی حکومت بین الاقوامی قانون کے تحت صیہونی بستیوں کو غیر قانونی اور امن کی راہ میں رکاوٹ سمجھتی ہے۔ عرب پارلیمنٹ نے آسٹریلیا کے فیصلے کا خیر مقدم کرتے ہوئے بین الاقوامی قوانین اور اقوام متحدہ کی قراردادوں کے مطابق اسرائیل فلسطین تنازع کے حل کے عزم کا اظہار کیا۔ عرب پارلیمنٹ نے آسٹریلیا سے مطالبہ کیا کہ وہ بغیر کسی تاخیر یا ہچکچاہٹ کے سرکاری طور پر بھی فلسطینی ریاست کو تسلیم کرے۔
