پنجگور اور نوشکی میں سیکیورٹی فورسز پر حملے، ایک اہلکار شہید، 4 دہشت گرد ہلاک

پنجگور : پنجگور اور نوشکی میں سیکیورٹی فورسز کے کیمپوں پر حملے کی کوششیں ناکام بناتے ہوئے 4 دہشت گردوں کو ہلاک کردیا گیا۔آئی ایس پی آر کے مطابق نوشکی میں دہشت گردوں نے ایف سی کیمپ میں داخل ہونے کی کوشش کی جس پر سیکیورٹی فورسز کی جوابی کارروائی میں 4 دہشت گرد مارے گئے جبکہ فائرنگ کے تبادلے میں ایک افسر زخمی ہوگیا۔دوسری جانب پنجگور میں دہشت گردوں نے سیکیورٹی فورسز کے کیمپ میں دو اطراف سے داخل ہونے کی کوشش کی جس پر سیکیورٹی فورسز کی بروقت جوابی کارروائی سے دہشت گردوں کی کوشش ناکام بنادی گئی اور دہشت گرد فرار ہوگئے جبکہ فائرنگ کے تبادلے میں ایک سپاہی شہید ہوگیا۔آئی ایس پی آر کے مطابق پنجگور میں حملہ کرنے والے دہشت گردوں کو بھاری نقصان پہنچایا گیا، دہشت گردوں کی ہلاکتوں اور زخمی ہونے والوں کا تعین کیا جارہا ہے۔