لبنان، یمن اور عراق سے مزاحمت کاروں کے اسرائیلی اہداف پر حملوں میں اضافہ

بیروت: لبنان۔ یمن اور عراق میں مزاحمت کاروں نے اسرائیلی اہداف پر حملوں میں اضافہ کردیا ہے۔ حزب اللہ نے لبنان کے مقبوضہ علاقے میں کئی صیہونی فوجی اہداف پر حملے کئے ہیں۔ روائسات العالم میں فوجی بیرک اور جلال العالم فوجی بیس کو توپ خانے سے نشانہ بنایا جس میں کئی فوجی ہلاک اور زخمی ہوئے ہیں۔ ان اڈوں پر صیہونی فوج کا دفاعی اور میزائل نظام نصب کیا گیا ہے۔ صیہونی تنصیبات پر ساٹھ سے زائد راکٹ داغے گئے ہیں۔
ادھر یمنی فوج نے بحیرہ احمر میں ایک اور جہاز کو میزائلوں کا نشانہ بنادیا۔ میزائل لگنے سے جہاز میں آگ بھڑک اٹھی جسے بجھا دیا تاہم کوئی جانی نقصان نہیں ہوا۔ جہاز پر پانامہ کا جھنڈا لگا ہوا تھا جبکہ امریکی سینٹرل کمانڈ کا دعویٰ ہے کہ پاناما کا پرچم بردار یہ آئل ٹینکر چین کی ملکیت ہے۔ امریکی فوج نے بحیرہ احمر میں یمن سے بھیجے گئے چھ ڈرون مار گرائے ہیں۔
عراق میں اسلامی مزاحمتی تنظیم نے ڈرون کے ذریعے مقبوضہ علاقوں میں اسرائیلی حکومت کی وزارت برائے عسکری امور کے ہیڈ کوارٹر کو نشانہ بنایا۔