یمن پر دوسرے روز بھی امریکی اور برطانوی فوج کے حملے، کئی مقامات پر بمباری

صنعا: یمن پر دوسرے روز بھی امریکی اور برطانوی فوج نے حملے کئے۔ دارالحکومت صنعا پر کئی مقامات پر بمباری کی گئی۔ شہر زوردار دھماکوں سے گونج اٹھا۔ امریکی فوج نے یمن میں دوسرے حملے کی تصدیق کردی۔ امریکی سینٹرل کمانڈ کے مطابق یمن میں حوثیوں کی ریڈار سائٹ کو آج صبح نشانہ بنایا گیا، امریکی بحریہ کے جہاز سے حوثیوں کی ریڈار سائٹ پر ٹام ہاک میزائل فائر کیے گئے۔ امریکی سینٹ کام کی جانب سے بتایا گیا ہے کہ حوثیوں کی ریڈار سائٹ پر حملہ جمعرات کی شب امریکا اور برطانیہ حملے کا تسلسل ہے۔ غیرملکی میڈیا کے مطابق گزشتہ روز امریکا، برطانیہ اور ان کے 8 اتحادی ممالک نے یمن میں حوثیوں پر 73 فضائی حملے کیے تھے۔ یمنی فوج کے ترجمان کا کہنا ہے کہ اڑتالیس گھنٹوں میں 73 حملے کئے گئے۔ اب تک پانچ افراد شہید اور چھ زخمی ہوچکے ہیں۔
امریکا اور برطانیہ نے لڑاکا طیاروں، بحری جہازوں اور آبدوزوں کی مدد سے یمن کے دارالحکومت صنعا، بندرگاہی شہر حدیدہ اور شمالی شہر سعدہ میں درجن بھر سے زائد مقامات پر بمباری کی تھی۔